كتبت / سلوى لطفي
تخيل ان عبد الحليم حافظ بعد إنتشار أغانيه في الإذاعة راح للمنتجة ماري كويني علشان يمثل فبصت له من فوق لتحت وقالت لا ما تنفعش تغني ايوه، إنما تمثل لا.. شكلك ما ينفعش في السينما ولا يمكن يقبلك الجمهور
…
عبد الحليم اخدن الكلمتين دول والدنيا اسودت في وشه خصوصا انها مش أول مره حد يقول له كده لكن ما كانوش بجرأة ماري كويني..بس كان نفس المعنى لما كانوا بيخلوه يغني ويركبوا صوته على ممثل تاني زي ما حصل في فيلم بائعة الخبز لما كان بيغني وشكري سرحان يحرك شفايفه او فيلم فجر لما كانت أغنيته في خلفية الأحداث بس..
….
فضل عبد الحليم كده تلات سنين لغايه ما ظهر أول مره في السينما سنة ٥٥ في فيلم لحن الوفاء اللي كان بطولته وفيلم ايامنا الحلوه ومن وقتها الملامح اللي مكنتش عاجبه المنتجين بقت اكتر ملامح تجذب الانظار وتحبها الكاميرا..
وبعد ما ارتفعت أسهم عبد الحليم في السينما طلب منه ماري كويني انه يشتغل في فيلم من إنتاجها لكنه المره دي هو اللي رفض .
ولكنها ربما من باب المكايدة انتجت فيلم اسمه ربيع الحب للمطرب كمال حسني اللي كان ظهر في فترة انطلاق عبد الحليم وكان مشهور أنه بيقلده وجابت كل ابطال ومخرج فيلم لحن الوفاء ابراهيم عمارة وزودت عليهم شكري سرحان وعبد السلام النابلسي وجابت محمد الموجي يلحن اغاني الفيلم هو ومنير مراد علشان تكمل عملية استنساخ فيلم لعبد الحليم.. بل وزودت عليهم فريد الاطرش اللي لحن اغنيه في الفيلم اللي فشل فشل ذريع رغم ذلك لأن كان ينقصه روح العندليب ❤️
