كتب / محمد رضا
حمزة عبدالكريم في دوري أبطال أوروبا…
من كام شهر بس، كنا بنتكلم عن لاعب مصري صغير انتقل من الأهلي لبرشلونة، وكنا بنسأل: هل هيقدر يدخل حسابات الفريق الأول؟ وهل فليك ممكن يديه فرصة؟
والنهارده..
حمزة موجود في قائمة برشلونة لدوري أبطال أوروبا. 🏆
مجرد إن لاعب مصري في السن ده يبقى اسمه موجود في قائمة برشلونة الأوروبية، وسط كل النجوم والمهاجمين الموجودين، دي خطوة كبيرة جدًا في حد ذاتها.
والأهم بالنسبة لي هو موقف فليك.
المدرب شاف حمزة في فترة الإعداد، واللاعب قدر يلفت نظره، وسجل 4 أهداف وكان من أبرز هدافي برشلونة في التحضيرات.
بعدها شارك رسميًا مع الفريق الأول في الليجا.
ودلوقتي اسمه موجود في دوري أبطال أوروبا.
يعني إحنا مش قدام مجاملة للاعب صغير… إحنا قدام لاعب بدأ يدخل تدريجيًا في حسابات الفريق الأول.
طبعًا وصول جابرييل جيسوس هيخلي المنافسة أصعب. وده طبيعي جدًا.
برشلونة عنده مهاجمين كبار، والمنافسة على مركز واحد مش سهلة، وحمزة لسه قدامه مشوار طويل عشان يثبت نفسه.
وأنا شايف إن وصول جيسوس مش معناه إن باب حمزة اتقفل.
بالعكس…
لو حمزة قدر يستغل الدقائق اللي هتجيله، حتى لو كانت 5 أو 10 أو 15 دقيقة، ويثبت إنه قادر يلعب تحت الضغط، فمع الوقت الدقائق دي ممكن تزيد.
📌 المهم دلوقتي إنه ما يستعجلش.
مش مطلوب منه يبقى ليفاندوفسكي الجديد، ولا ينافس جيسوس في الخبرة.
مطلوب منه حاجة واحدة:
كل ما فليك يديله فرصة، يخرج من الملعب وهو مقتنع إنه لازم يدي حمزة فرصة تانية.
ربنا يوفقه ويحميه من الإصابات، وإن شاء الله نشوف أول هدف مصري بقميص برشلونة في دوري الأبطال. ❤️🇪🇬
