بقلم / مني الشكح
انا العارجه اللي غزلتها برجل حمار
و ضحكت رغم خذلانها . و سامحت كل من خانها
و فضلت رغم احزانها…. جبل ما انهار..
انا الخايبه الغبيه غريبه الأطوار
نهارها صراع و ليلها متاع و مزيكا و كتير أسرار
تصور حبها في كلمه و ترسم لحن للعصافير
تعيش اسطوره من غنوه.. و تحزن لو قابلها فقير
خيالها بسيط و بيسافر .. و كل ما فيها بيعافر
بيخلق م الحياه حاجه. تاخدها من مساحه الضيق
و شايله الهم مبتسمه. و فايقة و شايفه… متفائله
بتغسل روحها يوميا… كأن حبيبها………علي بابها
تشق سنينها بجداره… لا بتخاف ولا تركع
و قالوا عليها جباره.. و هي بكلمتين تشبع
عيونها بتحكي من غير صوت
و فيها مراره لو بتموت…
كلامها عن الالم محدود
و جواها حلم بيحركها
قدرها تفوت علي الاحزان. تعطرها…
و تغزل م الالم معني يصبرها
و مهما الحزن فاق حده.. تصده
و تقلب الموازين و تغزل الرياحين
و تعرف باردو مين.. قاصد يدمرها
