بقلم / أسماء كامل
الموضوع ده ممكن يبقى بسيط في شكله، بس عميق جدًا في تفاصيله.
لو فكرنا هنلاقي إن الماضي هو الحتة اللي حسينا فيها بوجودنا، بحلوه ومره، الذكريات حتى المؤلمة منها، بتبقى جزء من شخصيتنا ومن اللي إحنا بقينا عليه دلوقتي.
أوقات كتير حتى لو الماضي كان مؤلم، بنفتكره عشان كان فيه لحظات حلوة احنا فاكرينها وعايشة جوانا، أو على الأقل أجمل من اللي احنا فيه دلوقتي.
والحنين ده بيبقى نابع من احساسنا إننا كنا فاهمين الدنيا وقتها جدًا وفاهمين تصرفاتنا ومقتنعين بيها، حتى لو ده مش حقيقي.
ولان المستقبل طبعا مجهول، ف التغيير بالنسبة لينا بيبقى حاجة مخيفة جدًا #مرعبة، والماضي حتى لو كان صعب، أهو حاجة معروفة ومفهومة لينا، وبنلاقي راحتنا في الحاجات اللي احنا عارفينها حتى لو كانت متعبة.
أوقات كتير العقل البشري بيبقى ذكي أوي، لدرجة انه بيخلّي الذكريات الصعبة تبقى أخفّ وأهدى مع الوقت، وبيخلّي اللحظات الحلوة اللي عيشناها تفضل واضحة وبتلمع قدام عينينا.
عشان كده، بنبص للماضي وكأنه أجمل مما كان زمان.
مهما كان الماضي مليان مشاكل، فيه حاجات عملناها فيه خلتنا فخورين بنفسنا، الحاجات دي بتخلينا نحس إننا قادرين نواجه أي حاجة، حتى لو الوضع الحالي مش على مزاجنا.
إحنا كبشر عندنا رغبة طبيعية نفهم اللي حصل في حياتنا، ف بنرجع للماضي عشان نحاول نصالح نفسنا مع اللي فات، نعرف سبب الألم أو نلاقي تفسير للحاجات اللي ما كناش فاهمينها، وبنحاول نفسر أسباب وجعها لينا.
#الخلاصة..
إن الماضي بيفضل دايمًا مكان مليان مشاعر متشابكة بين الحلو والمر، وده لأن الذكريات سواء كانت مؤلمة أو سعيدة، هي اللي بتشكل هويتنا.
علاقتنا بالماضي ممكن تكون وسيلة لفهم نفسنا أكتر، لكنها في نفس الوقت ممكن تكون قيد بيشدنا للخلف لو غرقنا فيه زيادة عن اللزوم.
الماضي بيخلينا نحس بنوع من “#الأمان” لأنه ثابت ومعروف، عكس الحاضر اللي أحيانًا بيبقى فوضوي، والمستقبل اللي دايمًا مجهول.
لكن المهم، إننا نعرف نفرق بين الاحتفاظ بالدروس والعِبر اللي اتعلمناها من الماضي، وبين إننا نعيش فيه على حساب حاضرنا ومستقبلنا، وده بيحتاج شجاعة لمواجهة الألم، ووعي إننا نستفيد منه بدل ما نسيب تأثيره يسيطر علينا.
الذكريات الحلوة ممكن نخلّيها طاقة إيجابية تساعدنا نكمل، والذكريات المؤلمة ف أيدينا نخليها دروس نتعلم منها، لكن التوازن هو المفتاح.
خلينا نستخدم الماضي كمرشد مش كعائق.
#أسماء_كامل
